أنا نفسى

سألت نفسى لماذا اخترت هذا الاسم تحديدا لمدونتى ؟؟؟؟؟ فوجدت هذه الاجابة : أنا نفسى أعمل حاجات كتير و مش عارف بجد , يمكن عشان أنا لسة صغير (18 سنة ) بس فكرت شوية و لقيت ان ده مش سبب و بعدين قلت يمكن يكون السبب فى تربيتى يمكن اتربيت غلط و لقيت ان ده برده مش سبب (لأ ده انا متربى صح أوى متفهمنيش غلط ) و بعدين فكرت شوية وقلت يمكن يكون السبب فى تعليمنا المتنيل بستين نيلة لقيت فعلا ان ده ممكن يكون سبب بس سبب صغير نسبته لا تتعدى ( 10% )و جه فى بالى سبب تانى قلت يمكن يكون السبب فى اعلامنا الى فعلا يشجع الواحد على الخمول و بيحصر تفكيره فى الأغانى و المسلسلات و الحب ( على فكرة انا مش ضد الفن بالعكس ولكن ضد انه ياخد حجم أكبر من حجمه ) و لقيت برده ان ده مش سبب و بعدين قلت يمكن يكون السبب فى الجو السياسى العام و الحكومة و برده لقيت انه مش سبب كفاية يخلينى مش عارف اعمل حاجة ............. كنت حاسس انى هتجنن و انا بفكر ............. برده لسه محتار و فضلت فترة كبيرة بفكر ايه السبب ........... و أخيرا ربنا هدانى لحاجة يمكن تكون هى السبب فعلا و هى ( -* أنا *- ) فضلت مستغرب شوية و مش مصدق و بعدين شربت كوباية كابتشينو و كلت تشيز كيك و نمت ساعتين و صحيت و شربت كابتشينو برده و قعدت فى البلكونة عشان الهدوء ( كانت حوالى الساعة 2 قبل الفجر ) و فكرت كتير فى اللى وصلتله و اقتنعت فعلا ان انا السبب بعد ما لقيت نفسى مسلم بلأمر الواقع و مش بحاول اعدله و بعد ما لقيت ان الرغبة اللى عندى ما كنتش كافية انها تحركنى و انى كنت يائس فترة كبيرة و كنت بشتكى من قلة الامكانيات مع ان كبار العلماء بدأو بإمكانيات أقل منى و مع ذلك وصلو للى هما عايزينو و مسلموش بالأمر الواقع زى ما انا سلمت ........... من الأخر إقتنعت انى انا السبب و كرهت نفسى جدا ........ وعشت يومين من أسوأ ايامى كنت كئيب جدا لدرجة انى كرهت الناس كلها فعلا ...... و فجأة و بدون أى مقدمات و بدون أى سبب اختفى احساس الكآبة اللى كان عندى و بدون أى وعى بدأت أفكر بإيجابية و ادور على حل استغليت الفرصة و رحت عامل كوباية الكابتشينو اياها و قعدت فى البلكونة اياها برده و فكرت بجدية شديدة فى الحل و بديهيا عرفت الحل و هو إنى ابدأ بتغيير نفسى للأحسن و المشكلة  اللى أنا فيها حاليا هى طريقة التغيير.

( ازاى اغير نفسى للأفضل ؟؟؟؟؟؟؟؟؟؟؟؟؟؟؟؟؟ )